وقعت ف أيدي مقاله المال او النفوذ أم الموهبه
السؤال بقي ....
هي إيه وظيفة الناقد الفني ؟
١. مشاهده العمل من غير تحيز
٢. وصف العمل .
٣. تحليل العمل
٤. تفسير العمل
٥. الحكم علي العمل مع توضيح إزاي الممثل أو المخرج قدر يستغل أدواته.وكمان كل حاجه متعلقه بالعمل نفسه ويبدأ يحلل ويقول
٦. بعد الحكم لازم يفسر ليه حكمه كان بالايجاب او السلب . حسب معلوماتي دي الخطوات ..انت بقي بتعمل ايه ؟ ولا حاجه ...نفس إللي عملته مع مصطفي قمر عملته مع خالد النبوي .....فين بقي النقض ؟ فين الشرح ؟ قولي الخط الدرامي هنا وقع عشان كذا وكذا ...الممثل هنا استخدم المرض ده عشان يعمل الشخصيه دي ...للأسف مش حتعرف تعمل كده مش تقصير منك لكن بسبب عدم الدرايه بادوات الممثل .وممكن كمان بقله المعرفه وده مش عيب انما إيه العيب ؟ العيب هو النقد لمجرد التواجد ...
..قريت ليك مقاله عن روجينا ومي عمر وريهام حجاج ....وإزاي إن ازواجهم بيساعدوهم ..
أنا موافق معاك علي ريهام والاستاذ محمد حلاوه ومي والاستاذ محمد سامي لو فعلا قلبك علي الشغلانه اشرح لريهام ومي ازاي يحسنوا من شغلهم... او تشرح لسامي او تشرح لهم يعملوا الشخصيات إزاي. وإزاي المخرج يغير من أدواته عشان يخلي الممثل ف أحسن حاله ...ازاي الدراما تتكتب كده وإزاي ممكن تؤثر علي العمل .انك مثلا تقول ان سامي لا يصلح للكتابه عشان كذا وكذا وكذا ..طب هل هم يستحقوا البطولة ف المسلسلات .اكيد لا انا عندي اسبابي وبقولها كل شويه وكل يوم ..انت بقي بتكتب أو تقول إيه ..قول لنا ليه مينفعوش ..اشرح لنا وليهم. ....تقدر تقولي ليه مش بتعمل كده ؟ انا عارف ليه ..للاسف حضرتك متعرفش ..متعرفش الممثل بيشتغل إزاي وايه ادواته وازاي ادوات المخرج تندمج مع ادوات الممثل ... ومتعرفش تقرا الحاله ...متعرفش تلاقي حلول ...كلامك ف جميع البرامج واحد ...عام ...راجل الشارع ممكن يقوله عادي. .انا ممكن أقوله عادي واقول أحسن منه مع إني مش ناقد . ياراجل ده إنت أشدت بمسلسلات بعينها وهي للاسف واقعه.

اللون الرصاصي مش بيكون واضح.. بيوجع العين . المفروض يكون ابيض واسود بس ...تخيل بقي انا كاتب كل ده عشان روجينا..وانا لاعرفها ولا عمري قابلتها ..ياراجل إنت بتقارن روجينا إللي هي داخله علي فوق ال تلاتين سنه خبره بمي عمر وريهام حجاج اللي كل تاريخهم اول امبارح ؟ طب ده كلام ؟ كمان بتتهم د. أشرف زكي إن هو اللي خلاها تكون بطله.

طب سؤال ..ايه اللي خلاه يستني طول المده دي وقرر يعمل ده ف اخر تلت سنين بس. طب ممكن استخدم نفس الحق معاك ؟ واقول إن مأمون الشناوي هو سبب أول تعيين ليك ف الصحافه ؟انا بقي اقول كده وإنت تثبت العكس. الفنانه روجينا مثلت قبل النقيب مايكون نقيب ..ومثلت لما استقال ومثلت وهو مش نقيب .تاريخ روجينا أكبر من إنك تختذله في المقال الرخيص ده.

مش عاجبك تمثيلها مش عاجبك تبقي بطله.. ..اشرح لنا الاسباب ..قول إزاي يتحسن وتقول برضه ليه ...خش ف الشخصيه واشرح ..خش ف النص واشرح خش علي المخرج واشرح ... ..خش علي نقط ضعفها لو موجوده واشرح.... ...ادي لكل واحد حقه لا زياده ولا أقل العجيب إن فيه اعمال متستحقش تكون علي الشاشه أصلا وإنت بتتجنب الكلام فيها انا عندي لسته كبيره بس للسنه دي . وده يطرح اسأله كتيره ...اسأله اجابتها مش ف صالحك خالص
باتمني اقرا ليك نقد فني بجد . مش هجوم من غير تبريرات.. مش هجوم علي أشخاص لكن هجوم علي العمل بالتفصيل زي مانا كاتب ف الأول
أخيرا..الناقد لازم يحط مشاكله الشخصيه علي جنب وينقد من غير إنه يحب ويكره. ساعتها بس بيمسك قلمه ويكتب ابيض واسود بس . تحياتي