كشفت الإعلامية ميار الببلاوي، عن أزمتها الأخيرة مع الفنانة وفاء مكي وعن تفاصيل ما حدث بينها في حفل زفاف نجلها لأول مرة، موضحة "اتسجل دون علمي مع وفاء مكي من مصور في فرح ابني لاستغلالي في دعمها".

ووضحت ميار، ببرنامج "علامة إستفهام": "لما جت فرح إبني هي مقعدتش كتير في الفرح ووقفنا نتكلم وبسلم عليها وهي ماشية فالمصور قالي بصي بقى عايزك تقفي جنب وفاء وكان مسجلي في التليفون من غير ما ياخد إذني لأن أنا كنت بفضفض مع الناس أي حد كان يجبلي سيرة وفاء كنت بتكلم معاه بأريحية وأصعب حاجة إنك تكون بتتكلم مع حد ويسجلك ده شئ أنا مش هسكت عليه".

وأضافت: "دي ضيفة وجايالي وقالتلي عشان خاطري وعشان خاطر إبني وانتي عندك ابن يا ميار وأنا ضعيفة من ناحية الحتة دي فقولتلها الكلام ده مر عليه زمن والناس ممكن تهاجمني وده مالوش أي علاقة بالقانون لأن حكم القضاء نافذ وعادل.. قالتلي حتى أتبرأ قدام إبني عشان أعرف أشتغل .. قولتلها حاضر هستخير وأقولك ومشيت واتكلت على الله".

تعود واقعة وأزمة الفنانة وفاء مكي إلى عام 2001 أي قبل 22 عاما، عندما تم اتهام وفاء مكي ووالدتها بتعذيب خادمتين، والبداية عندما فوجئ الأب "عبد الحميد" بابنته "مروة" عادت إلى المنزل في القرية في حالة إعياء شديدة وبها آثار تعذيب، وأخبرته أنها تعرضت للكي بالنار والضرب على يد الفنانة وفاء مكي، وأن شقيقتها هنادي هي الأخرى تعرضت لنفس التعذيب، ليذهب بها إلى المستشفى ويحضر شقيقتها، ويحرر محضرا اتهم فيه وفاء بتعذيب ابنته التي كانت تبلغ من العمر 15 عاما.